النهارده اتخذت قرار مهم هو اني اتلم شويه في البيت وابطل تنطيط
والقرار الاهم بقي
مش هشتري الجرنان ولا هشوف الطبعه الاولى ولا مني الشاذلي
واكيد مش هشوف 90 دقيقه هيه هيه هيه
مع العلم اني مبحبش اشوفه اساسا لاسباب لا تخفي علي احد
يبقي اكيد النهارده مش هكتئب
هيه هيه هيه
المهم قلت استغل تواجدي في البيت واعمل حمله اعدام جماعي لكارتين الورق الغريبه اللي عفي عليه الزمن عندي
وبدئت الرحله
كرااااااك...... شيييييييييك......ييك ييك... كرااااايش
كل ده كان اصوات للتقطيع ومش اي تقطيع
تقطيع تقطيع يعني
المهم وانا في قمه الاسبهلال من كميه الاوراق الغريبه اللي عندي واللي معرفش انا جبتها من فين اصلا
وقع في ايدي كومه حاجه كدا
اتضح في الاخر انه دفتر
او كان دفتر
طلع انه عندي يجي من 10 سنين كدا ولا بتاع
_انا بفكر افتح معرض اي والله _
المهم بدات اقلب فيه
وكل مااقلب صفحه اتنح
واهز راسي زي الكتكوت المبلول
وشويه واقوم انقط شويه ميه علي وشي
وشويه واقول ايه الافتري ده
بصوا هتفهموا لو نقلت لكم جزء يتجزء من الف الف جزء من اللي كان في المصيبه ده
في صفحه غبره من صفحاته مكتوب فيها
من فتره جم ارايب _ اقارب _ماما وجه معاهم واد غلس قووووي وعبيط كمان ويمكن يطلع اهبل
وكان معاه حته اتاري _ الاتاري ده حاجه شبيه بالبلايسيشن_ومش رضي يلاعبني بيه ولا يلاعب خالدوعمرو
_خالد ده اخويا وعمرو ابن خالتي _
قمنا خدناه عالمطبخ وضحكنا عليه وحرقنا ايده بملعقه الشاي
ههههههههههههه
_الضحكه الصفره ده كانت موجوده بالنص وبعدد الهائت_
ده صفحه
صفحه سوده تانيه كان مكتوب فيها
النهارده انا اتعلمت اعمل البيض الزاي
ياحلوتك يابت يانوسه
:)
افتكر اني وانا في تانيه ابتدائي لما ماما كانت بتروح الشغل
رجعت انا وخالد مره بدري
ولقيته بكل برائه بيقول
تيتي انا جعان
_ تيتي ده العبده لله _
وتيتي ده ليها حكايه تانيه اللي بيشوفوا عندنان ولينا منكن يفهموها
المهم
انا بصراحه ضعفت وجينات الحنيه جوايا ابتدت تلعب
وبحنيه الام
ولا يهمك ياحبيبي انا هدخل اعملك طبق بيض :)
وجري عالمطبخ
ومن جويا صوت عميق بيقول والله وكبرتي
وشويه وعوني كانت هدمع
المهم
جبت طبق زجاج محترم وحطيته عالنار وطش
طشيت الزيت
ورحت جري عالثلاجه اجيب البيض
واذا فُجاءهً
اسمع صوت انفجارات وطاخ طييييخ بووووم اترااااااش
لم اجرء علي الالتفات الا بعد سكون الغاره
جريت علي الطبق خير اللهم اجعله خير
معرفش ليه سعتها افتكرت الصحن الطاير بتاع جرنديز
المهم اكيد السبب ان ماما بتسترخص في شرا الحاجه
ومع هذا وذاك لم اياس
وجبت الضحيه التاليه قصدي الطبق التالي
وحطيته عالنار والمره ده حطيت سمنه _يكونش العيب المره اللي فاتت في الزيت _
ومشورت رجلي لغايه الثلاجه اجيب البيض
وخلال رحلتي كنت بتسائل هي الريحه ده جايه من فين
مش مشكله يابت يانوسه طالما مفيش اصوات الريحه مقدور عليها
ورجعت احط البيض
خير اللهم اجعله خير
فين الطبق ياجدعان؟؟
ادور يمين ... شمال مفيش فايده
كل اللي لقيته كوعبيره سوده بطلع دخان
وبعد تدقيق اكتشفت ان الكعوبيره ده هي مشروع الطبق البلاستك
اللي راح ضحيه تيتي انا جعان
المهم لميت الفضايح
وناديت
خلووووووووووودي
الواد جاي مزاطط فين الاكل
وانا بكل الطيب اللي جوايا
قلت له خذ ارمي الكيس ده تحت وان جبت لماما سيره هفجرك
مشي شويه وفي ايده الكيس وبعدين التفت
تيتي انا لسه جعان
وافتكر ان ده اخر كلمه نطقها الي يومنا الحالي
انا عارفه اني طولت عليك
لكن وانا بقلب افتكرت حاجه بس ده حصلت من سنيين
بكل بساطه جارتنا اللي قدامي ضايقتني شوووي
وكنت اياميها باخذ ضفاضع وديدان في الكليه
بكل بساطه حطيت ضفضعتين في جيبي ودخلت عندهم
والنبي يابنتي اعمل ليا كوبايه شاي
البنيه تخلت تعمل الشاي وانا سرحت كل ضفدعه في اتجاه
_شغل علي ميه بيضا _
ورجعت بتنا بكل بررراءه
وفين بعد ساع الصوووويت اشتغل
ياعبدوووووو الحقني
ههههههههههههههههه
انا قلت مسكوهم
لكن مسكوا مين بقي دول كانوا اثنين
فين الساعه 2 بيليل نفس ياعبدوووو بتاعه المغرب
هههههههه
كفايه بقي لحسن انا افتكرت العلقه اللي خذتها يومها
