بما اننا في اليومين دول بنشهد عده انفجارات اخطرها طلب نواب الحزب الوطني ضرب المتظاهرين بالرصاص ويجي بعدها في الخطوره انفجار دكتور الاسنان في وشي وفي الاخر اقلهم ضررا انفجار بركان ايسلاندا
وعشان نبقي في السليم
فانا اخترت اني اكلمكم عن بركان ايسلاندا
وبستهيالي ده اامن بكتير
لحسن نروح ورا الشمس
ومعلش قبل مانبتدي نحب نطمن كل اللي يجي هنا
ان المدونه بعيده كل البعد عن منشار الدكتور وعن مجال انتشار رماد البركان
يعني خذوا راحتكم مش مستعجلين
:D
بسم الله نبتدي كدا ونشوف ايه الحكايه
بركان ايسلاندا ويقع علي جبل إيجافجالاجوكل الجليدي
وبنختصره باسم ايجافجا
البركان انفجر يوم 14 ابريل 2010
وسبب دخان البركان المتطاير تعطيل كثير من رحلات الطيران واغلاق مطارات بلادان عديده منها
سويسرا .. النمسا .. المانيا .. وبلدان اخري
وقبل مانكمل هنعرف الاول عالسريع شويه حجات عن البراكين
البركان ده بقي جبل مخروطي الشكل يتكون من قصبه وهي زي الماسوره الي بتوصل اسفل البركان بالفوهه
والفوهه ده هي فتحه البركان اللي بتظهر علي سطح الارض و بتخرج منها المواد البركانيه (الافا) والغازات
زي الهيدروجين والكلورين والكبريت والنيتروجين والكربون والاكسجين
وفي الغالب بتثور البراكين لما بيحصل تغيرات في باطن الارض
سواء كميائيه او حركيه زي الزلازل
ورماد البراكين مش بيسبب بس اضرار انمابرضو له فوائد كثيره
منها انه بياثر علي الاحتباس الحراري وبيزود خصوبه التربه وبيزود المعادن في التربه وحجات تانيه كثيره
وبرضو احب ازود انه من اشهر البراكين هو بركان فيزوف اللي استمرت ثورته 16 سنه
ودوات نرجع لبركان ايسلاندا
اللي حصل باختصار
انه في تاريخ 20/3/2010 بدأ نشاط البركان يزداد بشكل ملحوظ ولكنه لم ينفجر
وبتارخ 14/4/2010 ازداد نشاط البركان الي ان انفجر
وده ادي الي ارتفاع درجه الحراره اللي ذوبت الجليد المحيط بالبركان
فاختلط الماء البارد بالافا الساخنه جدا في البركان
وسبب في تجمدها بسرعه وتحويلها الي قطع صغيره جدا من الزجاج والحصي
وهنا يجي دور الرياح اللي حملت كل ده مع الغبار ونشرته في اماكن كثير
وده اللي سبب في اغلاق مطارات كثيره في اروبا
وتعطيل كثير من الرحلات الجويه
لان ارتفاع الغبار وصل للمجال الجوي اللي المفروض الطائرات تحلق فيه
ومن المعروف ضرر الغبار البركاني علي محركات الطائرات واللي يؤدي الي توقفها وهيا في الجو
وده حصل بالفعل سنه 1982 لطائره من الخطوط البريطانيه كانت تخترق احد سحب
الدخان البركاني في اندونسيا فتعطلت محركاتها الاربعه وبدئت السقوط من ارتفاع 11 كيلومتر
ولم يعد للعمل سوى ثلاث محركات ولكن بعد ان اصبحت الطائره علي ارتفاع اربعه كيلومترات من الارض
وجدير بالذكر برضو
انه كان في بعض الاخبار اللي بتاكد وصول الغبار الي مصر يوم الاربعاء الموافق 21/4/2010
واللي هيسبب بهطول بعض الامطار
وكانت بعض الجهات بطالب المواطنين اللي ملهمش لزمه في الشارع يقعدوا في بيوتهم
ومعرفش اذا كان ده مقصود خصوصا انه يوم الاربعاء 21/4 ويوم الخميس 22/4 كان موعد
لتظاهرات سلميه لشباب حركه 9 مارس تحت عنوان
(وقفه للتعليم العالي ضد البلطجه)
اللي كانت هدفها الاعتراض علي التدخل الامني البلطجي في حرم الجامعات
لكن بصراحه الجو بقاله كذا يوم جميل جدا والحراره معتدله مائله الي البروده ليلا
ونزلت امطار خفيفه فعلا يوم الثلاثاء
وحاولت اني ادور في كذا مكان هل ده بسبب البركان بس للاسف متوصلتش لاي شئ
وفي الاخر احب اختم بحاجه قراتها في عده منتديات لكن معرفش مدي صحتها والله اعلم
قرات ان مايحدث من انتشار للدخان البركاني تحقيق للايه الكريمه
بسم الله الرحمن الرحيم
فَارْتَقِبْ يَوْمَ تَأْتِي السَّمَاءُ بِدُخَانٍ مُّبِينٍ (10) يَغْشَى النَّاسَ هَـٰذَا عَذَابٌ أَلِيمٌ (11) رَّبَّنَا اكْشِفْ عَنَّا الْعَذَابَ إِنَّا مُؤْمِنُونَ (١٢)
صدق الله العظيم
ربنا اكشف عنا العذاب انا مؤمنون
نسرين
23/4/2010
