الشهر ده اقل مايقال عنه انه شهر الافراح والليالي الملاح
بكل بساطه كدا
اربعه من اصحابي اتجوزوا الاسبوع ده
واثنين هيحصلوهم الاسبوع الجاي
D:
اي والله كل ده في اسبوع واحد
بصوا هنبتدي من الاول وواحده واحده
العروسه الاولى
ساره & محمد
سوسو
:)
حبيبه قلبي
بخلاف انك قولتي ان كتب الكتاب في الصديق وطلع في الفاروق
هعديها ومش هتفرق كلهم خلفه راشدين
وبخلاف ان انا واسماء طول الطريق نفتكر احنا صلينا علي مين في المسجد ده
مش هتفرق برضوا ياحبي اهو كلها دار مناسبات
لكن اللي فرق معايا بقي
التتنيح اللي انتي كنتي فيه
ساره ده ياجماعه ليها في كل انواع الروشنه والضحك والطفوله والتنطيط
لكن الصدمه ليا اللي شوفته يومها
ادب ايه واحترام ايه وجمال ايه
والاهم رزانه ايه
لدرجه اننا قعدنا ندور فين ساره ياجماعه
المهم بقي البنت بعد ماسمعت الكلمتين بتوع زوجتك وقبلت والحوار ده وهي من ساعتها مش بتنطق
مبروك ياساره
تهزلك راسها
تنقرصك في ركبتك ياساره
تهز راسها
سحبنا البونيه ودخلناها القاعه وقعدناها الكوشه
وكانت اول كلمه والله البنت نطقتها
لا
(وش متنح)
لا ايه ياساره
مخلاص الفاس وقعت فالراس
لا مش هوقع علي اي ورق
طبعا كل اللي كانوا واقفين مسدقوا وكانوا هيموتوا ويوقعوا هما
:)
المهم بعد اقناع مرير وتهديد بالسلاح الابيض
( صيدله بقي وكل واحده شايله في شنطتها مشرط الضفاضدع)
البنت اقتنعت ان الورقه اللي هتوقعها لن تتخذ ضدها في اي اجراء امني
ووقعت ساره
ودخل العريس الضحكه من هنا لهناك
يعيني عليك يامحمد منتا ياحبه عيني متعرفش
طلع محمد يعد عالكوشه
ومد ايده عشان ياخذ بايدها ويطلعها عالكوشه
ولقينا الابتسامه وسعت وسعاته بيقول يااااه اخيرا مسكت ايدك
والبت قال مكسوفه وتشد ايدها
(سبيه يمسكها يافوزيه)
ههههههههههههههههههه
طبعا صاحب هذه الكلمه ان عينه عملت زوووو لبره ورجعت مكانها تاني
( ساره افتكري النصايح بتاعه السنفره اللي طول عمري اقولك عليها اي نعم ثلاث اربعها كان بيحرق بشرتك بس متنكريش ان لولها مكانت عين الاخ بظت لبره لما مسك ايدك )
طبعا محمد ياعيني هيفكر ان ايد البونيه كدا بالفطره
وميعرفش السنفره اللي كنا بنعملها قبلها بليله
:)
المهم كل ده وهي متنحه تتنيحه غريبه وكل اللي بتعمل بتهز راسها
لغايه مفوجئنا ان العروسه والعريس مش موجودين في القاعه
طبعا ياساره انا فرحانه ليك جدا جدا بس اللي مش مخلي فرحتي تكمل ان محمد صعبان عليا
ربنا يكون في عونك
وف الاخر بقولكم
بارك الله لكما وبارك عليكما وجمع بينكما علي خيييير
وبقولك بالخصوص ياساره بلاش حركات المتجوزين دوووول
ردي ياماما عالموبايل والا
D:
*****
العروسه الثانيه
نيره & محمد
ايه حكايه محمد معاكم ياجماعه
نورا انتي بقي بجد فرحانه ليك قوووووي قوووي
اي نعم انا كانت عيني في الحمام والبط والورق عنب وانا بطلعهم من الثلاجه
الا اني فرحانه ليك
واي نعم برضوا اني حيلي اتهد معاكي في الكوافير وفستاني بااااظ
بااااظ يانورا افتكري ده
الا اني فرحانه ليك
واي نعم ان يوم الحنه انا مخدتش حاجه ساقعه
الا اني عوضتها تاني يوم واخذت مرتين
واي نعم برضوا ان يوم الفرح اللي كان سايق العربيه اللي انتي فيها جابلي شلل
الا اني فرحانه ليك برضوا
واي نعم انا لغايه دوات معرفش هو زوجك دكتور ولا مدرس ولا بيشتغل ايه
الا اني فرحانه ليك برضوا
نورا
بارك الله لكما وبارك عليكما
:)
****
ولاء & والمناااضل شريف
D:
ويل يا ويل ..... هايل ياتيمون
النشيد ده لازم اقوله كل ماشوف ولاء وهي تكمل
ولاء ده بقي ياجماعه اكيد كلكم عارفنها صاحبه مدونه مسلمه
ولاء ده بقي اللي يشوفها برضوا النهارده ميقولش ان ده البونيه اللي كانت بتسرسع في الاذاعه كل يوم
ولا اللي كل ماتكلمها لازم تحشر وسط كلامها كلمه ( شووو) عالفاضي والملايان
_ غالبا جدها الكبير كان راح سياحه للبنان ومرجعش من سعتها _
ولا هي برضوا اللي منكن تنفضلك وانت بتكلمها لو الكلام مش عجبها وتسيبك وتمشي
كانت ايه ولا الملاك الطاهر
( يابنتي الملاك ده كان فين ايام ثانوي ايام معرفتك انا ونهي بخناقه )
واللي ميز اليوم ده انه كان زي يوم سااااره جمع فيه ناااااس من زمان مش شفتهم
ولا كان يمكن اشوف كل الناس ده مجتمعين الا عند ساره او ويل
فمنهم اللي مش بنشوفه الا في الموتمرات او هيكستب
والفئه التانيه اللي مش بنشوفهم غير في الكليه اللي انا معدتش بروحها
والفئه الثاله الناش اصحبنا من ايام ثاااانوي
والفئه الرابعه الناس اللي مش بنشوفه غير في اللقاءات
تخيلوا كل دووول كانوا موجودين في يوم واحد
:)
ولاء بقي بعكس ساره اول مابصمت علي الورق رفعت صبوعها لفوق بعلامه النصر
_ ياويل الصور كلها الفيس لاتقلقي _
:)
وبعدها قعدت تعييييط
_ جتك خيييبه هو حد طااايل _
طبعا كلنا خذناها من زوجها
_حقد بقي _
لكن القدر كان اقوي مننا وعرف يوصلها
وبعد ماسلم عليها
نفس الكلمه بتاعه محمد
اخيييييرا
هههههههههههههههههههه
انا بستهيالي الناس ده بتكتب الكتاب عشان يسلموا علي بعض
ياجماعه هناك فؤائد اخري لكتب الكتاب
ايه محدش بيقرا فقه السنه واحياء علوم الدين ولا ايه
D;
طبعا وكالعاده العروسه للعريس و.......
وخذ عروسته ومحدش شافهم
ومعلش ياويل انا هقولك هنا بارك الله لكما وبارك عليكما وجمع بينكما علي خير
لاني بصراحه مكتبتش كدا في الاتوغراف اللي كان محطوط علي باب القاعه
ههههههههههههههههههههههههههه
افتكر اني كنت كتبت ان ربنا رحم عمو وابتلى شريف
هههههههه
*****
العروووسه .....
انا نسيت العد
D:
رضوي
رورو السهنه
يابنت الذين
مش ده يابت اللي كنت تيجي تقولي ده بيقولي لايجوز
وانا اقولك ظل لايجوز ولا ظل حيييط
ايه دوات بطل يقول لايجوز
ولا حول الي يجوز
:)
علي راي المثل ياما في اللايجوز مظالييم
ياستي بارك الله لكما وبارك عليكما وجمع بينكما علي خير
:)
*****
زهرا
بنت عمتي
افتكري يازهرا العيش والملح اللي كلناه سوا
وافتكري العهد اللي اتعاهدنا عليه
ليه الدنيا بتعمل كدا
مع اول عريس تبيعي القضيه
مااااااااااااااااااااشي
يابطه
مبرووووووووووووووووك
اهي واحده من العيله والباقي انشاء الله يكر وراها
اي نعم محدش كر ورا انجي من خمس سنين
ولا ورا نرمين ولا ورا شيري
واي نعم انه شباب العيله اللي يسامحهمم بقي
بس جايز مع زهرا الموضوع يختلف
زهرا ياجماعه معملتش فرح اكتفت بالحنا
و
اخذت فلوس الفرح وطلعت علي تركيا النهارده
اهي هي ده دماغ الدكاتره ولا بلاش
ربنا يستر ونشوف تاثير تركيا عليكي لما ترجعي يا بطه
اهم حاجه خلي بالك
تركيا برد يابنتي
:)
*****
انا تعبت بجد
ايه يا عيال اتهدوا بقي
كل ده في اسبوع ونص
عموما
ربنا يكرمك كلكم
ومش تنسونا منك ليها ليها وانتم فاهمين قصدي كويس وبلاش تستهبلوا
مسيركم تحتاجوا لينا
واسئلوا مريم
مين يامريم بيشيل لك حسن
مش انا
اي نعم انا بحذفه اخر مابزهق من زنه
بس برضوا
اه معلش ياجماعه بالمره بقي
عايزه ابارك لعلا علي الملود اللي شرف( يحي )
ربنا يكرمك فيه يارب
واحب كمان اقول لدكتور عبد الفتاح والدكتوره ميسون
بارك الله لكما وبارك عليكما وجمع بينكما علي خير
اممممممم
غالبا شكلي هبارك لحد من الدكاتره قريب
لان في شغل في الكليه من تحت لتحت كدا
بس علي مين
طلبه بقي وفاضين ومش ورانا غير نعرف اخر الاخبار
D;
وفي الاخر جالنا اتصال ونقوووول الووووو
الووو
منكن اهني
اه اتفضلي يافندم
بهني ماما وبابا وتيته واهدي الاغنيه الجا......ى
اظاهر الاتصال انقطع
:)
معلش حاجه بقي احب اقولها في الاخر لفتت نظري
ليه يابنات لما بتغنوا عايزه ايه ياحبيبه
بتنسوا النشييييد كله وتيجوا عن حته معينه صوتكم يعلى فيها طبعا انمتم عارفين انهي حته
D;
بطلوا بقي حركات البنات ده
وعقبالكم ياااارب كلكم
وقريب هنزل لكم اغنيه ماشاء الله يااخوات
يلا عشان العرسان يتبسطوا
D;
12 جرب تطيــر:
واآآآآو
بجد روووعه
استمتعت بالقراءة
تحياتي
بجد وربنا هلكت ضحك
هرجع تاني
وربنا انت تحفة
سلام يا حبيبة قلبي
ألف مبروك للي تجوزوا
وربنا يهنيهم ببعض
وعقبال اللي عايز من اللي ظلوا
بس بجد ما شاء الله عنك يا دكتورة
أسلوبك رائع في الكتابة
مليان بالسعادة
ربنا يهني الجميع يا رب
عقبالك انتي كمان
يا اجمل العروسات
متهاليي لو عملنا استفاء من اجمل عروسة في كلية صيدلية هتتطلعي انتي
ولو عملنا استفتاء من اجمل عروسة في المنصورة برضه هتتطلعي انتي
ولو عملنا استفتاء علي اجمل عروسة جاية من السعودية برضه هتتطلعي انتي
برضه لو عملنا استفء علي اجمل عروسة في المدونات دمها خفيف برضه هتتطلعي انتي
متهاليي عريسك وهو بيقول اخيرا هيكون اسعد كائن حي في الكون منذ ملايين السنين
ربنا يوافقك في حياتك يا نسرين
بالمناسبة السعيده دى عايز اهنى لول بنمتى عمتى واقولها مبروك عالخطوبة
ولو سمحتى عايز اسمع اغنية
الليلة عيد والعريس بيتجوز لسمير غانم
انا افتكرت نفسى فى برنامج اغانى
عالعموم مبروك ليهم وربنا يكرمهم
وعقبالك
نسرين انتي فين ؟
قلقتني عليكي
يا ليت تظهري بسرعة
اظن ان الامتحانات خلصت
مش تحرمينا من كتابتك بليز
انا بجد قلقان اوي
وحاسس انهوا في حاجة
ياليت تطمينا
؟؟؟؟؟؟؟؟؟؟؟؟؟؟؟؟
??????????????????????
نسرين ؟
طيب احنا ذنبنا ايه تتآخري كده ؟
انا قلقان عليكي اوي
لعل المانع خير
ارجو ان تعودي سريعا
السلام عليكم
اسفه جدا ياجماعه عالتاخير
لكن الحمد لله المانع خير
كنت بجوز باقي اصحابي
:)
يلا عقبال الكل
احمد
اظن بعد ماعرفت السبب لي عذري
انس
ربنا يكرمك
ويل
لما اشوفك يابنت الذين
عرفتي تزوغي مننا انا ومريم في الزفه وخلتينا تمشي علطول وانتم لفيتوا
عموما العربيه وقفت مننا في وسط الشارع وانا ومريم منظرنا كان رائع واحنا فاتحين كبوت العربيه وبنحاول نصلح اي حاجه
:)
بهاء
ربنا يكرمك يافندم
واياكم
wanna b a physician
ربنا يكرمك يافندم
وادينا بندور عالاغنيه وهنحاول نجبها
:)
يلا عقبال الجميع يارب وربنا يديم الفرح
الحمد لله
حمدلله علي السلامة
عود احمد
ياربنا ترجعي لينا اوي
وكتير
زي زمان
بجد وحشتيني
نسرين
Post a Comment