لاول مره من زمان اشوف شروق الشمس
من غير قصد
ليلتها عدي عليا الوقت من غير محس
كنت سرحانه في ولا حاجه
بهرب من كل حاجه
بهرب من اي حاجه بتوجعني
بهرب من نفسي
لـ ولا حاجه
وانا سرحانه
ابتديت احس الدنيا بتنور
فقت من السرحان
لقيت الشمس ابتدت تطلع
والدنيا بتنور
بلون برتقالي جميييل
كنت في الدور السادس
وحاسه اني قريبه منها
وقفت مره واحده
لقتني عايزه ابتسم
فتحت ذراعاتي
حسيت بيها بتغمزلي
وبتقولي ايه ياسرحانه
صباحك نور
ابتسمت اكثر
شورت لها باديا
وقلتلها هيه صباح الخير
تشربي شاي
:)
غمضت عنيا
وكاني بقفل عليها
او بحضنها
قولتها من جوايا
صباااح النــــــــــــــــور
وصليها مني
لكل اللي بحبهم
وصليها للنيل اللي كنت كل يوم بعدي عليه
واقوله صباح النور
وصليها للمكان اللي بحبه
واللي كنت بحب اقعد فيه
وصليها لكل حد نورك هيلمسه
فضلت ابصلها
وهي بتزحف علي الارض الفاضيه قدامي
والنور بيقرب
والظلمه بتخاف وتجري قدامه
ابتديت احس بالدفا
لقتني بقول بصوت عالي لنفسي
اممممممممممممه
ياتري ايه هيحصل النهارده؟؟
مين هيقاسمني بطوله يومي
ومين هيحتفظ بدور البطوله
لباقي ايامي
فضلت فاتحه ذراعي كاني بحضن نورها
وضمتهم علي نفسي
فتحت عنيا
وخذت نفس طوووويل
وقلتلها
هيييييي
صبااااح النــــــــــــــور
3/2/2010
8 AM
3 جرب تطيــر:
احب اقول شعورك جميل يانسرين
انا اول مرة ازور مدونتك
بس لما شفتها حسيت انها فيها احساس
من غير ما ابص على المواضيع
اما وصفك للصبح
فالشعور ده احنا كنا بنسهر كتير علشان نشوفه
وكل واحد فينا كان بيشوفه بطريقته
انا كنت بشوفه نعمه من الله عزوجل
ورؤيتك فيها شاعريه وجمال
يظهر اني هضيفك عندي في المدونه بتاعتي
وفقكم الله
صباح الخير
يارب دايما كل ايامك دفء
يـاهـ يانسرين مدوونه راائعه اتحفينادوماً بروائعك
Post a Comment