بره الشبــــابيك
بره الشبابيك غيوم
بره الشبابيك مطـر
.....
...
..
من غير سبب معروف ارتبط حبي لمنير بالشتا
ومن غير سبب انا بحب الشتا
يمكن عشان بهوى نهاره
بشمسه الدافيه
بدوب عشق في ليله الهادي ... البارد
بعشق بروده ... لاني متاكده انه مش برود قساوه
برود من نوع تاني ... يخليك ويجبرك تدور علي القلوب اللي بتحبها
عشان تدفيك وتاخذ قلبك في حضنها
....
...
..
بتدوبني لـذه ورعشـه غريبه بحسها في ليله بس
بحسها لما هواه يِخبـط شباكي ومطره ينادي بصوت عالي
وانا كمشانه تحت بطنيه
وكبايه شاي بالنعناع مدفياني
....
...
..
ادمنـت ريحتــه في الشوارع بعد مايغسلها
بيعجبني حزنه في وحدته
ويثر شجني آلمـه واحساسي بغربته
....
...
..
الشتا مسرح الرومانسيه الحزينه
وقت عمر خيرت
مكان لاجمل اغاني منير
وانغام بس في القديم
....
...
..
سمعت كتير ان اللي اديه بتبقي بردانه يبقي قلبه دفيان
ومع ان اديا دايما ساقعه وبردانه
بس قلبي برضو بردان
ومع ذالك بدوب في تفاصيل الشتا
ودايما بستناه وجوايا حلم اني اجري في يوم تحت مطره بقلب دافي
....
...
..
اسيب البوست ينزل وارجع انا لمنير
....اخر مره اما سبتك كتمت الشكوي ليه.....
....مش كان احسن حسبتك وعرفت القصه ايه.....
....لكن محسبتكيش وقلتلك مفيش لانك ياحببتي امرك ميهمنيش....
....انا خايف من ده فيا مــ الشكوى المداريه ....
بالذات في الليله ديا تحت الغيم والمطر
مالي خايف خايف وحاسس بالخطر
بره الشبابيك غيوم
بره الشبابيك مطـر
7 جرب تطيــر:
الله عليكى بجد ...انا اتفق مع كل كلمة قلتيها...ده انا حتى مسمية مدونتى بره الشبابيك..هاهاهاها
ده انا متهيألى زى ما اكون انا اللى كاتبة الكلام ده...اخدتيه من طرف لسانى....رفرفى يا طير الحرية كمان و كمان
على فكرة انا صيدلانية...بس متخرجة بقالى خمس سنوات
هههههههههههههههههه
نورتي يادكتوره تعيش وتتعايش مع البرد
وبعدين انا اللي كاتبه او انتي مش هتفرق
زي ماقلت لك احنا هنعمل رابطه محبي الشتا
وكله في سبيل الجنان
:)))
وعقبااااالي يارب مابقي متخرجه وبقالي خمس سنين
:)))
هاهاهاههاها...ساعتها هتقولى يا ريتنى ما اتخرجت...هاهاهاها
على فكره يانسرين اغلبنا بنحس الاحساس ده
بس تعبيرك عن الاحساس ده اكثر رومانسيه
جميل اوي البوست ده يانسرين
شكرااااااا
ماجد
ربنا يكرمك يافندم علي المتابعه
Post a Comment