تررررن تررررن ... ترررن
كان الصوت المزعج اللي بيصحيني كل يوم
خبطته خبطه كتمته ... ششششش هو انا لسه لحقت انام ساعه
رجعت انام تاني ... يمين شمال مفيش فايده
وادركت اني همارس العاده بتاعتي
فضلت مبحلقه للسقف وكاني بحب فيه جديد
....
...
...
تررررن تررررن ... ترررن
نفس الصوت المزعج بعد ساعه ونص من البحلقه
مبدهاش بقي ... قمت اتوضيت وصليت وجبت كتابي اقرا كلمتين ينفعوني حينما لا ينفع الندم
....
...
تررررن تررررن ... تررررن
الله هو انا مش ورايا غيرك ولا ايه
طب هعمل ايه
منا معنديش حد يصحيني ولا يفكرني بالوقت الا موبايلي الغلبان
ومع اني بخبطه كل خبطه والتانيه ... بس اصيل والله يابو رحاب
المره ده كان بيفكرني اني لازم البس وانزل عشان الحق الامتحان المنكوب ايه
****
وصلت الكليه
وعدى اليوم الدراسي الملل الحمد لله علي خير
بخلاف بعض الاصابات الطبعيه
من حروق ولسعات وخبطات والوان تندلق وبلع بعض المواد ... الخ الخ
***
خلصت كليه
بس مش عايزه اروح
اعمل ايه ... اعمل ايه ؟؟؟
افتكرت ان النهارده معاد درس اليوجا اللي بطلته من فتره
( اذاً فهي اليوجا )
وصلت الزمالك علي معاد التمرين بالظبط
وغير كل مره مكنتش عارفه اركز في ولا حركه بعملها
خرجت بعد ساعه من التمرين زي مادخلت
ياقلبي لا تحزن
****
كانت الشمس خلاص بتختفي تقريبا
مشيت في شارع ام كلثوم علي كورنيش الزمالك
وفجاءه
لقيتهم قدامي
وبدون اي مراعاه لاداب اللياقه والذوق ... فضلت مركزه معاهم قوي
مش عارفه ليه ؟؟
!!!
بطلت ال ام بي ثري وشيلت السماعات من ودني
كنت عايزه اسمعه بيقولها ايه يخليها تضحك كل شويه كدا
وكنت بضحك بصراحه
كل ماشوفه بيقرب منها ويحاول يمسك ايدها
وهيا تضربه مره وتبعده مره وتسيبه مره
(وانا بقول في سري سبيه يمسكها يافوزيه )
فضلت ماشه وراهم وكاني كنت عايزه اسرق شويه سعاده منهم
وزي العاده مفضوحه ... خذوا بالهم
مفضوحه دايما كدا
فضلت تبص وراها وبعدين تقوله حاجه فيبص هو كمان
كنت عايزه اضحك لها واعمل لها باي باي ... بس قلت كفايه جنان اتلمي بقي
عملت نفسي ببص علي النيل
وآآآآآي ... محستش الا والدنيا بتلف بيا
وسمعت صوتهم بيضحكوا بصوت عالي وهيا بتقول احسن
شويه وادركت اني خبطت في فرع شجره خلى منظري وحش قوووي
خاصا بعد ما مكان الخبطه احمر وظهر
...
...
****
الشمس خلاص اختفت
ومع ان نورها لسه موجود الا ان القمر ظهر حلو قوووي وواضح
طلعت الام بي ثري وحطيت السماعات
...
...
نحلم ونحلم بالحياه المفرحه
واتاري احلمنا بلا اجنحه بلا اجنحه
ندور ندور بجناح حزين مكسور
سعات نشوف في العتمه وسعات نتوه في النور
بنلف في دواير والدنيا بتلف بينا
ودايما بننتهي مطرح ماابتدينا
...
...
نسيت كل حاجه وانا بغني
وكالعاده سرحت في ولا حاجه
ترررن ترررن ... ترررن
الله بقي هو ده وقتك
المره ده كانت رنه الاتصال
***
الو سلام عليكم _
وعليكم السلام ازيك يانسر _
الحمد لله تمام ... اخبارك ايه _
انا كويسه ... فينك _
انا في .... في ... _
بصيت حوليا ادور علي حاجه تدلني علي المكان اللي انا فيه
وتنحت تناحه التنين
الو نسرين سمعاني _
ايوه يابنتي _
فينك ؟_
انا في الجيزه _
!!!!
جيزه ايه ؟؟ بتعملي ايه هناك يامجنونه _
معرفش _
شوشو معلش هكلمك بعدين
زي متحبي بس خلي بالك من نفسك وطمنيني عليك _
حاضر ... سلام _
سلام _
****
فضلت في مكاني فتره ... مش مسدقه انا ايه اللي جابني هنا
!!!
ابتسمت ابتسامه من غير معني ... وكملت طريقي
***
بعد ساعه
ترررن ترررن ... ترررن
مش هنخلص بقي
السلام عليكم _
وعليكم السلام ... ايه روحتي _
هو انا لحقت يابنتي ... هو فيه حاجه ؟_
لا بطمن عليك _
انا كويسه _
طب فينك ؟_
لسه في الجيزه _
ايوه فين يعني في الجيزه _
في نادي البولينج عند كوبري الجامعه كدا _
نسرين اجيلك _
لالا يابنتي انا بكتب حاجه وهقوم خلاص اروح _
طب لما تروحي كلميني _
اوك سلام _
سلام _
***
قفلت الموبايل خااالص ... مش عايزه اسمع اي ترررن النهارده تاني خلاص
رجعت تاني ابص قدامي
كان النيل رااائع في صفاءه وامتداده
ومن بعيد كان كوبري الجامعه وكانه مشهد من فيلم صامت
وانعكاس انوار اللوحه الكبيره بتاعت هيتاشي وجراند حياه والفورسيزون
رااائع وهو يتمايل علي النيل كلما هبت عليه نسمه هوا
وانا هناك ... لوحدي مع كوبايه شاي بالنعناع
وقلم ونوته حمرا صغيره
...
...
...
نسرين
في يوم عادي
الاحد
من نادي البولينج ... الجيزه
الخامس عشر من شهر مايو
الثامنه مساءا
0 جرب تطيــر:
Post a Comment